Tiranë, 31 mars, NOA/ Milena Selimi - Ardian Isufi dhe Edi Muka i rivijnë publikut me një gjetje të re, e cila është finalizuar sot me ekspozitën "Teatri i hijeve".
Me këtë emër, në fakt, titullohet ekspozita e artistit Ardian Isufi, e cila hapet ditën e mërkurë në galeritë "FAP" dhe "Zeta".
Një seri pikturash mbi monumentet, organizuar në formën e një teatri nga ana e kuratorit Edi Muka, që ka bashkëpunuar me të për këtë ide.
Janë një sërë pikturash, të cilat janë të organizuara në konstruktin e një shfaqje teatrale. Bashkëpunimi i tyre nuk është i ri.
Dhe, sipas kuratorit të saj, nuk ka të bëjë fare as me teatrin e hijeve si formë teatrore, shumë e përhapur në Azi, Turqi, Greqi e Itali, por me vetë hijen.
"Ekspozita është ndërtuar në dy pjesë, në galeritë "Fap" dhe "Zeta".
Pikturat janë vendosur në një mënyrë tepër organike, pjesë e një instilacioni teatror. Muret janë veshur me perdet e kuintave të një skene teatri, në mënyrë që vizitori të bëhet pjesë e tij, të shkrihet me hijet dhe të lexojë ndikimin që ka mbi të.
Ka piktura dhe vizatime me situata nga monumentet e realizmit socialist, por jo vetëm, sepse në të shohim edhe situata qesharake. Shohim monumente që jo detyrimisht i përkasin ideologjisë, por fesë, si në rastin e minares, të ndërtuar në oxhakun e fabrikës së qelqit në Kavajë.
Në mes të galerisë është monumenti i një punëtori, të marrë nga Durrësi dhe nga dhoma tjetër, piktura me monumentin e Leninit, që rastësisht është fshehur pas pemës, i shoqëruar nga një monument fiktiv partizanësh dhe një shi meteorësh, që bien nga qielli. Të gjitha këto elemente teatrorë qartësohen nga drita skene...", është shprehur në një intervistë mediatike, kuratori i saj.
Ardian Isufi është artist i grafikës dhe i disa fushave të artit. Aktualisht është pedagog në Akademinë e Arteve në Tiranë. Edi Muka është një nga kuratorët më aktivë të arteve vizive në Shqipëri.
m.s/n.e/NOA
