Tiranë, 1 prill, NOA - Pushimi prej prokurorisë i hetimeve mbi emrat e dorëzuar nga Inspektoriati i Lartë i Deklarimit të Pasurive, është konsideruar i drejtë nga gjykata dhe kjo tregon se vendimarrja e saj nuk ka qenë me standarte të dyfishta, por e bazuar në ligj.
Me këtë argument, organi i prokurorisë i është kundërpërgjigjur akuzave të drejtuara para komisionit të Ligjeve nga Inspektori i Përgjithshëm i Deklarimit dhe Kontrollit të Pasurisë, Adriatik Lalla se prokuroria përdor standarte të dyfishta në hetimin e rasteve të referuara nga ILDKP.
"Por Prokuroria sqaron se vendimarrjen, në rastin e hetimeve penale, e bazon në provat e administruara gjatë hetimit nga policia gjyqësore. Në rastin kur pushohen hetimet vendimet e prokurorisë në bazë të ligjit janë të ankimueshme në gjykatë dhe tek prokurori më i lartë", thuhet në deklaratën reaguese të organit të akuzës.
Duke përmendur emrat konkretë për të cilët janë mbyllur dosjet, Florian Nova me detyrë ambasador; Arjan Ndoja me detyrë prokuror dhe Shpëtim Guxholli me detyrë inspektor tatimesh në Korçë; prokuroria pohon se kjo është bërë në bazë të ligjit.
n.e/NOA
