Klinë, 4 Prill, NOA - Pashkët katolikë janë festuar në mënyrë madhështore në Klinë të Kosovës. Ceremonia ka nisur pak përpara mesnate. Besimtarët katolikë shqiptarë morën mesazhet e kësaj feste në orën 20:00 të mbrëmjes nga klerikët e të gjitha kishave në këtë komunë, si në atë të Klinës, Zllakuqanit, Budisalcit, Poterqit, Doberdolit etj.
Përmes mesazheve të përcjella, përfaqësuesit të kishave katolike shqiptare, në kishat ekzistuese, vlerësuan kremtimin e kësaj dite të shenjte si një ngjarje e shënuar gëzimi, e cila rigjallëron në zemrat e besimtarëve ndjenjat më të thella të dashurisë dhe mirëkuptimit për njerëzit.
"Në atmosferën e gëzueshme të Festës së Pashkëve, ndihem pranë jush dhe pranë çdo besimtari e familjeje, që pret me mirësi dhe shpresë ditën kremtuese të ringjalljes së Krishtit, për t'ju përcjellë urimet më të përzemërta për paqe, harmoni e shpresë për të ardhmen. Ne kemi rastin të lutemi për më shumë dashuri për njëri-tjetrin e për familjet tona, në kërkim të një dimensioni akoma më të lartë të tolerancës e të bashkëjetesës, në të mirë të fesë e të kombit, po ashtu edhe të bashkëkombësve tanë kudo që ndodhen", u ka thënë besimtareve, dom Izaku, në Kishën Katolikë në Zllakuqan të Klinës.
m.xh/NOA
