Tiranë, 8 prill, NOA - Në ditën parë të prezantimit si Kryeinspektori i Inspektoratit Ndërtimor e Urbanistik Kombëtar, Gjergj Bojaxhi ka përcaktuar dhe prioritet ku do të fokusohet detyra e tij e re. Në prezantimin e bërë sot në Ministrinë e Transporteve, Bojaxhi ka theksuar se eliminimi i ndërtimeve pa leje është një detyrë parësore.
"Unë e shikoj dukurinë e ndërtimeve pa leje si një kancer që vazhdon të deformojë hapësirat urbane në qytetet dhe fshatrat tona, si një evazion fiskal i cili është i dukshëm dhe që rëndon drejtpërdrejt në arkat e pushtetit lokal", ka thënë ai në ceremoninë e prezantimit.
Ai theksoi se zonat ku do të këtë më shumë kontrolle dhe zbatim efikas të ligjit janë; akset rrugore, akset energjetike, parqet kombëtare, kurora e gjelbër e kryeqytetit të vendit, si dhe zonën e bregdetit.
Duke u ndalur në zonën e bregdetit, Bojaxhi theksoi se ky peizazh "është një pasuri kombëtare dhe ne në mënyrë sistematike do ta pastrojmë nga ndërtimet pa leje".
I vetëdijshëm për vështirësitë e këtij procesi, Bojaxhi theksoi se ndërhyrjet janë të domosdoshme "në mënyrë që Shqipëria të këtë një zhvillim të qëndrueshëm urban dhe ekonomik".
Në prezantimin e kryeinspektorit të ri ka qenë i pranishëm, Ministri i Punëve Publike, Transporteve dhe Telekomunikacionit (MPPT), Sokol Olldashi, i cili vlerësoi profilin e Gjergj Bojaxhi dhe theksoi se me ndryshimet e reja në ligjin përkatës, problemi i ndërtimeve pa leje do të minimizohet.
Emërimi i Bojaxhi është bërë në bazë të ndryshimeve në ligjin "Për Inspektoratin e Ndërtimit".
"Jam i bindur që me këto dy element të rinj, me Kryeinspektorin e ri dhe me ndryshimet në ligjin, inspektorati do t'i përgjigjet shumë më mirë nevojës që ka për të kontrolluar dhe për të ushtruar detyrimet e veta ligjore mbi territorin", u shpreh Olldashi.
Ai theksoi se Bojaxhi do ti japi përmasën e duhur Inspektoratit Ndërtimor Urbanistik Kombëtar.
Në ceremoni, Olldashi përmendi dhe rastet abuzive të nderimeve pa lejë nga ana e drejtuesve të pushtetit vendor.
"Situata është e tillë që nuk kemi më vetëm individë, qytetarë që ndërtoj në mënyrë ekstra-ligjore, por kemi filluar së fundmi të kemi dhe institucione të pushtetit vendor që po abuzojnë me ligjin dhe po ndërtojnë në mënyrë të paligjshme, besoj që qëndrimi duhet të jetë i njëjtë ndaj të dyja palëve, ndaj shkeljes së ligjit janë njësoj si qytetarët si institucionet", përfundoi fjalën e tij Olldashi.
m.xh.NOA
