Shkup, 8 prill, NOA - Liderët e katër partive kryesore në Maqedoni nuk kanë rënë dakord për ndryshimet kushtetuese të propozuara nga kryeministri Gruevski, por janë pajtuar që ato të diskutohen më parë nga grupe ekspertësh.
Kryetari i BDI, Ali Ahmeti pas takimit ka vlerësuar me nota pozitive marrëveshjen për shqyrtimin e propozimeve nga ekspertët e partive politike.
Katër liderët e partive, Ali Ahmeti nga BDI, Nikolla Gruevski nga VMRO-DPMNE, Branko Cërvenkovski nga LSDM-ja si dhe Imer Selmani nga DR-ja përveçse debatit për propozimin e Gruevskit mbi ndryshime kushtetuese në sferën e Këshillit Gjyqësor Republika (KGJR), kanë kërkuar edhe ndryshime kushtetuese në sfera tjera.
LSDM paralajmëroi propozimin e ndryshimeve kushtetuese që kanë të bëjnë me veprat penale të cilave u ka skaduar afati.
"Në takimin e liderëve dorëzojmë propozim-ndryshimin, respektivisht plotësimin e nenit 52 të kushtetutës me të cilën do të pamundësohet skadimi i afatit të veprave penale që kanë lidhshmëri me transformimin e kapitalit shtetëror dhe shoqëror", ka deklaruar lideri i LSDM-së, Branko Cërvenkovski.
n.e/NOA
