Tiranë, 9 prill, NOA - Shqipëria dhe Kosova përballen me sfida të përbashkëta, ndër të cilat më e rëndësishmja është ajo e perspektivës së afërt evropiane të të dyjave.
Këtë fakt e ka bërë me dijeni kryetari i Partisë Socialiste, Edi Rama, pas një takimi që ka zhvilluar në selinë rozë me kryeparlamentarin kosovar, Jakup Krasniqi, të cilit i ka komunikuar premisën pozitive të Shqipërisë për të siguruar një integrim sa më të shpejtë drejt Bashkimit Evropian.
"Shqipëria dhe Kosova kanë sfida të përbashkëta në kushtet e një ekonomie e cila në shtetin fqinj ka probleme të mëdha, ndërsa në rastin tonë si Shqipëri, paraqet kushte të rënda", tha në fjalën e tij Edi Rama.
Më tej, tha se këto jaanë sfida që paraqesin si dosmosdoshmëri ndryshimin e situatës, duke përmendur faktin se papunësia është një plagë e madhe në Kosovë, ndërsa në Shqipëri është një plagë që thellohet përditë për shkak të një situate të vështirë ekonomike.
"Ishte kënaqësi të ndanim atë që ishte mendim i konsoliduar, atë të një perspektive të qartë për Shqipërinë dhe Kosovën si dy vende që shohin drejt Evropës dhe një popull që do të integrohet në Bashkimin Evropian", tha në fjalën e tij Rama.
Këto deklarata të tij, u mbështetën edhe nga kryeparlamentari kosovar, Jakup Krasniqi.
n.e/NOA
