Varshavë, 11 prill, NOA - Mbërrin sot në Poloni, në atdheun e tij, trupi i pajetë i presidentit polak Lech Kaczynski, i cili humbi jetën ditën e djeshme në një incident ajror në Smolensk të Rusisë.
Lajmi bëhet i ditur nga mediat polake, sipas të cilave, ora 14.00 parashikohet të jetë edhe momenti i mbërritjes së trupit të presidentit të ndjerë në selinë e presidencës polake, aty ku me mijëra qytetarë kanë kaluar gjithë natën në përkujtim të tij, duke u lutur dhe ndezur qirinj.
Trupi i pajetë i Lech Kaczynskit u identifikua nga i vëllai i tij Jaroslav, ndërkohë që Rusia ka krijuar të gjitha kushtet për familjarët e viktimave të aksidentit tragjik ajror që ata të mund të identifikojnë trupat e të dashurve të tyre, të cilët humbën jetën bashkë me presidentin e vendit.
n.e/NOA
