Uashington, 12 prill, NOA - Në qoftë se armët bërthamore bien në duart e terroristëve të Al Kaedës, ata nuk do të hezitojnë t'i përdorin ato.
Një fakt të tillë e ka bërë me dije presidenti amerikan Barak Obama, i cili e ka quajtur terrorizmin bërthamor si rrezikun më të madh për sigurinë kombëtare, ndërsa sekretarja amerikane e Shtetit, Hillari Klinton, theksoi se shqetësimi më i madh i botës sot për sigurinë bërthamore është se materiale të tilla mund të bien në duart e grupeve terroriste si Al Kaeda.
Këto deklarata u bënë prej tyre në prag të samitit për sigurinë bërthamore, i cili zhvillohet sot dhe nesër dhe ku janë ftuar presidentët dhe kryeministrat e 47 vendeve.
Në qendër të vëmendjes në takimin dyditor do të jetë parandalimi i përhapjes së armëve bërthamore dhe sigurimi i materialeve nukleare ushtarake dhe civile.
"Fatkeqësisht kemi një situatë kur në mbarë botën po humbasin sasi të mëdha materialesh bërthamore. Prandaj objektivi qendrori i këtij samiti është vendosja e bashkësisë ndërkombëtare në rrugën e reduktimit të materialit nuklear në një kornizë të caktuar kohore dhe me një plan specifik", tha në lidhje me një fakt të tillë, presidenti amerikan.
n.e/NOA
