Kryeparlamentari Krasniqi priti një delegacion të Bundestagut gjerman
Prishtinë, 13 Prill NOA - Kryetari i Kuvendit të Republikës së Kosovës, dr. Jakup Krasniqi, ka pritur sot në takim një delegacion të Komisionit për Punë të Brendshme të Bundestagut gjerman, të kryesuar nga Gunter Baumann, me të cilin ka biseduar për zhvillimet në vend dhe bashkëpunimin ndërmjet Kosovës dhe Gjermanisë.
Krasniqi, ka thënë se Kosova po krijon traditë demokratike, ndërsa perspektiva dhe angazhimi i institucioneve të saj janë integrimi në Bashkimin Evropian dhe në institucionet e tjera euroatlantike.
Udhëheqësi i delegacionit nga Bundestagu gjerman, Gunter Baumann, nga ana e tij, potencoi mbështetjen e Gjermanisë për zhvillimet pozitive në Kosovë, të cilat, siç tha ai, janë mbështetur përmes programeve të ndryshme.
Ai tha se qëllimi i kësaj vizite është të shihet se deri ku kanë arritur këto programe, të cilat kanë të bëjnë me fushën e sigurisë, të drejtësisë, riatdhesimin e kosovarëve etj. Bauman theksoi se gjatë kësaj vizite ka konstatuar që Kosova është në rrugë të drejtë dhe se është vlerësuar se ajo po lëviz drejt Bashkimit Evropian.
Ai tha se Gjermania e mbështet këtë rrugë të Kosovës për në BE. "Kemi parë shumë zhvillime të tjera pozitive në Kosovë. Rinia e saj paraqet një potencial për ndërtim dhe zhvillim të vendit", theksoi Baumann.
Kurse kreu i Kuvendit ka vlerësuar se gjendja në Kosovë është stabile, dhe në këtë aspekt ka veçuar rolin e KFOR-it, në kuadër të të cilit veprojnë edhe ushtarë gjermanë. Kryeparlamentari Krasniqi i ka njoftuar deputetët e Bundestagut edhe për të arriturat e tjera në Kosovë, si: zhvillimin ekonomik, decentralizimin dhe integrimin e komuniteteve, Strategjisë për Veriun etj.
Delegacioni gjerman është njoftuar nga kryetari i Kuvendit edhe me procesin e njohjeve të pavarësisë së Kosovës dhe të mbrojtjes së saj në Gjykatën Ndërkombëtare të Drejtësisë, si dhe me synimet e Kosovës për anëtarësim në organizatat ndërkombëtare, posaçërisht në OKB.
Duke dhënë një pasqyrë të strukturës dhe të punës së Kuvendit të Kosovës, kryeparlamentari Krasniqi ka shfaqur interesimin e legjislativit për të thelluar bashkëpunimin me Bundestagun gjerman.
Krasniqi i ka falënderuar parlamentarët gjermanë për mbështetjen në vazhdimësi që Gjermania i ka dhënë Kosovës në të gjitha proceset që e kanë përcjellë atë, si dhe për prezencën civile dhe ushtarake të saj në Kosovë. a.b/NOA
