Tiranë, 13 prill, NOA - "Sjellja e opozitës në momentet më domethënëse për integrimin e vendit në BE, tregon se ajo është kundër interesave kombëtare". Ky është qëndrimi i Lëvizjes Socialiste për Integrim, i mbajtur sot nga Zëvendëskryetari i saj, Edmond Haxhinasto.
"Vendi nuk ka qenë kurrë më parë kaq afër një ngjarje të shumëpritur nga gjithë shqiptaret: lëvizjes së lirë në hapësirën evropiane, që do t'i bëjë ata të ndjejnë e të prekin realisht Evropën", tha ai.
Haxhinasto shtoi se është për të ardhur keq "që kundër kësaj rryme e këtyre objektivave mbarëshqiptare vepron sot opozita, e cila ka zgjedhur pengimin e këtij procesi integrues".
Ai u shpreh se opozita po del nga rruga dhe institucionet legjitime, në vend që të njohë përgjegjësitë e saj dhe të kontribuoje për forcimin e tyre.
Sipas tij PS-ja, "po e ndan popullin në "opozitar" e "pushtetar", në vend që të punojë për interesat e gjithë qytetareve".
Haxhinasto u shpreh se mazhoranca po vijon reformat dhe LSI-ja do të propozojë shumë shpejt rekomandimet për Kodin e ri Zgjedhor.
m.xh/NOA
