Hagë, 13 prill, NOA - Sot në Gjykatën Penale Ndërkombëtare të Hagës, shënohet seanca e parë gjyqësore ndaj Radovan Karaxhiçit, ku ai do të përballet me dëshmitarin e parë kundër tij.
Bëhet me dijeni se ai do të jetë Ahmet Zulic, një ish-i burgosur në një kamp serb në fillim të luftës, në rajonin e Sanski Most, në verilindje të Bosnjës.
Zulic ka qenë i pranishëm, në qershor të vitit 1992, në ekzekutimin e rreth 15 burrave të cilëve iu pre fyti nga ushtarët serbë.
Ndërsa në një tjetër episod, Zulic ndodhej në një kamion që transportonte të burgosur dhe disa prej tyre u mbytën nga ushtarët serbë.
Nga ana e tij, ish-kreu i serbëve të Bosnjës, i cili akuzohet për krime kundër njerëzimit dhe genocid gjatë luftës së Bosnjës ndërmjet viteve 1992 dhe 1995, përfshi masakrën e Srebrenicës, ka njoftuar se do të jetë i pranishëm në sallën e gjyqit.
Ai ka deklaruar se masakra e Srebenicës ishte një trillim, një mit dhe që bombardimet mbi Sarajevë ishin një gënjeshtër që u orkestrua nga myslimanët për të shkaktuar reagimin e ndërkombëtarëve.
n.e/NOA
