Tiranë, 15 prill, NOA - Deklarata më e fortë ndaj bojkotit të Partisë Socialiste, nga një përfaqësues ndërkombëtarë në Tiranë është bërë sot nga Ambasadori i OSBE-së, Robert Bosch.
Në takimin e Konsorciumit Ndërkombëtar, ambasadori Bosch është ndalur në efektet negative që ka sjellë bojkoti i PS-së, duke dëmtuar sipas tij sistemin demokratik me mos miratimin e ligjeve për reformën e gjyqësor.
"Po shfrytëzoj rastin për t'i kërkuar opozitës që të reflektojë gjatë dhe thellë për veprimet e veta, të cilat tashmë de facto po dëmtojnë procesin drejt një sistemi demokratik modern. Duhet bërë e mundur që ata të ndjejnë se pjesëmarrja e tyre aktive dhe e vazhdueshme në Kuvendin e Shqipërisë është e mirëpritur si me fjalë ashtu dhe vepra", tha Bosch.
Ai theksoi se shumë prej reformave të nevojshme në drejtësi kanë ngecur. Sipas tij mungesa e opozitës në parlament pas zgjedhjeve të përgjithshme, "ka shkaktuar vonesa në miratimin e ligjeve për të cilat kërkohet një shumicë votash prej tre të pestave".
Përvecc votave të nevojshme, Bosch është ndalur dhe në cilësinë e ligjeve që miraton Kuvendit, ku sipas tij, "mungesa e opozitës do të thotë gjithashtu që shumica e ligjeve po miratohen pa pasur nivelin e pritshëm të diskutimeve".
m.xh/NOA
