Prishtinë, 16 prill, NOA - Përfaqësuesit ndërkombëtarë në Prishtinë kanë dënuar aktin e sulmit ndaj avokatit Avni Gjakova në rastin e Albin Kurtit, i cili dje u gjuajt me vezë nga aktivistët e "Vetëvendosjes".
Pieter Feith, përfaqësues special i Bashkimit Evropian në Kosovë, Yves de Kermabon, shef i Misionit të EULEX-it, dhe Renzo Daviddi, shef i Zyrës Ndërlidhëse të Komisionit Evropian në Kosovë, e kanë dënuar fuqishëm këtë akt, duke pohuar se "është jashtëzakonisht e rëndësishme për sundimin e ligjit që institucionet dhe ata që e kanë për detyrë të punojnë me to të jenë në gjendje që të punojnë pa ndërhyrje politike, pa u penguar dhe pa dhunë".
"Respektimi i institucioneve dhe i atyre që punojnë në to, - siç theksohet në komunikatë, - është parim themelor i sundimit të ligjit në një shoqëri demokratike dhe një nga vlerat kryesore evropiane.
Ne u bëjmë thirrje autoriteteve vendase që ta mbrojnë pavarësinë e gjyqësorit si pjesë e konsolidimit të sundimit të ligjit dhe rritjes së progresit të Kosovës drejt ardhmërisë evropiane".
Ndërkaq, pas aktit të gjuajtjes me vezë, avokati Avni Gjakova, ka refuzuar të vazhdojë mbrojtjen e Albin Kurtit, ndërsa avokat mbrojtës i tij është caktuar, Musa Dragusha.
n.e/NOA
