Qarkullimi ajror mbi Evropë mbetet përgjithësisht i paralizuar prej resë së hirit të vullkanit nga Islanda. Dhjetëra mijëra udhëtarë janë të bllokuar nëpër aeroporte.
Në Gjermani enti për sigurinë ajrore e zgjati ndalim-fluturimin deri në orën 2 të mëngjesit të së dielës. E njëjta gjë vlen për Britaninë e Madhe, Danimarkën dhe shtetet baltike.
Në shumë vende të tjera evropiane të prekura qarkullimi ajror u ndalua deri të paktën në orën 20.00.
Vetëm hapësira ajrore në Evropën jugore është e hapur për ngritje dhe ulje.
Edhe kancelarja gjermane Angela Merkel vazhdon të jetë e prekur gjatë udhëtimit të saj të kthimit nga SHBA-ja, raporton radio DW.
Pas një ndalimi të detyruar prej resë së hirit në Lizbonë, kancelarja do të vazhdojë fluturimin fillimisht për Romë.
Vullkani në akullnajën e Islandës vazhdon të hedhë një re gjigante me avull dhe hi. Matjet tregojnë se tymi arrin lartësinë mbi tetë kilometra.
Sipas meteorologëve në Reikjavik, përfundimi i aktivitetit vullkanik nuk është i parashikueshëm.
