Tiranë, 20 prill, NOA- Pas ndërtimit të rrugës Durrës-Kukës, kryeministri Sali Berisha ka hedhur idenë e një projekti të ri mes dy vendeve, atë të ndërtimit të linjës hekurudhore. Deklarata e kryeministrit Berisha është bërë sot gjatë takimit me ministrin e Jashtëm kosovar, Skënder Hyseni.
Pas vlerësimit për ndërtimin e rrugës, Durrës-Kukës, Berisha ka thënë se "se është e rëndësishme që të dy vendet të ndërmarrin hapat për studimin e fizibilitetit për një projekt të dytë madhor që do të zgjeronte lidhjet midis tyre, por edhe mbarë rajonin, ndërtimin e linjës hekurudhore midis dy vendeve".
Në takim u diskutua për zgjerimin e bashkëpunimit mes dy vendeve në të gjitha fushat, në veçanti për promovimin e mëtejshëm të shkëmbimeve ekonomike, tregtare, kulturore, në fushën e energjisë si dhe bashkëpunimit rajonal dhe në kuadër të integrimit europian dhe atë euroatlantik.
Duke vlerësuar arritjet e mëdha të Kosovës, Kryeministri Berisha theksoi se Kosova është shndërruar tashmë dhe po konsolidohet gjithnjë e më shumë si një faktor thelbësor paqeje dhe stabiliteti në Ballkan.
Hyseni e informoi Kryeministrin Berisha për fillimin e punimeve për pjesën e rrugës së kombit që kalon në Kosovë dhe e falënderoi edhe një herë për kontributin e tij për realizimin e veprës madhore të kombit, rrugës Durrës-Kukës-Morinë.
Ministri Hyseni e falënderoi përzemërsisht Kryeministrin Berisha për pritjen e ngrohtë dhe miqësore dhe i përcolli përshëndetjet e Presidentit Sejdiu, Kryeministrit Thaçi.
m.xh/NOA
