Tiranë, 22 prill, NOA- Një prej kompanive më të rëndësishme zvicerane do të investojë ne vendin tonë, gjatë viteve të ardhshme 4 miliard euro në fusha të ndryshme. Marrëveshja e bashkëpunimit u nënshkrua sot mes ministrit të Ekonomisë, Tregtisë dhe Energjetikës, Dritan Prifti dhe përfaqësuesve të kompaninsë Rudana Investment Group.
Ministri Prifti theksoi e veç shumës që do të investohet, firmosja e marrëveshjes së bashkëpunimit është dhe një hap për sjelljen e sa më shumë investimeve të huaja në vend.
"Më vjen mirë që investitorë seriozë dhe të suksesshëm zgjedhin Shqipërinë për investimet e tyre. Sigurisht, dhe duke marrë garancinë e qeverisë shqiptare për mbrojtjen dhe mbështetjen e këtyre investimeve, për krijimin akoma më shumë të një klimë besueshmërie për investitorët, të një klime akoma më të përshtatshme për bërjen biznes në Shqipëri. Unë e falënderoj përfaqësuesin e Rudana Investment Group që kanë zgjedhur Shqipërinë për të investuar", u shpreh ministri Prifti.
Rudana Investment Group është një kompani zviceriane, kryesisht përfaqësuese e një konsorciumi investitorësh të vendeve të Gjirit Persik, por edhe investitorësh europianë. Për Grupin Rudana Investment memorandumi u nënshkrua nga zëvendësdrejtori i Përgjithshëm i kompanisë, Hamy Salem.
m.xh/NOA
