Tiranë, 23 prill, NOA - Kryetari i Partisë Socialiste deklaroi sot se protesta e Partisë Socialiste në 30 prill nuk do të kthehet në një përplasje të dhunshme. Por nga ana tjetër, Rama theksoi se këmbëngulja e qytetarëve për të rrëzuar këtë qeveri do të jetë konstante dhe e vazhdueshme.
Në një bashkëbisedim me gazetarët, Rama u shpreh se "askush nuk duhet të përfytyroj një përplasje të dhunshme". Ai komentoi raportet e fundit të institucioneve ndërkombëtare për Shqipërinë, ku sipas tij, vendi ynë krahasohet me nivelin e "Ugandës, Senegalit, Mozambikun etj".
Kreu i PS-së u ndal gjatë në situatën ekonomike duke e cilësuar atë si të falimentuar. Për këtë arsye, Rama u shpreh se qytetarët duhet të ngrenë zërin.
"Në 30 prill do të bëjmë një përshkallëzim të kësaj beteje dhe përsërisim që Berisha dhe pushteti i dalë nga vota e grabitur, të mos bëjnë qorrin dhe shurdhin se ky vend nuk mund të kthehen në një mbretëri të pashpallur, ku pasuria përdoret në funksion të një grushti njerëzish".
m.xh/NOA
