Modena, Itali, 25 Prill 2010 NOA - Një aksident fatal ka ndodhur në Itali duke i marrë jetën një nëne shqiptare dhe fëmijës së saj vetëm dhjetë vjeç, raporton korrespondenti i agjencisë NOA.
Ngjarja ka ndodhur në rrugën "Abba e Motto" pranë lokalitetit Massa Finalese, provincë e Modenas. Emigrantja 37-vjeçare, së bashku me djalin e saj 10 vjeç, humbën jetën gjatë përplasjes së dy autoveturave që vinin nga kahje të kundërta të rrugës.
Fëmija i vogël gjeti vdekjen në vend kurse e ëma pak minuta më vonë gjatë transportimit për në spitalin me të afërt.
Policia rrugore e Modenas tha se nënë e bir së bashku me katër persona të tjerë, tre të rritur dhe një fëmijë, që të gjithë shqiptarë, gjendeshin në bordin e një makine tip Citroen (burime te tjera flasin per nje Opel te vjeter) kur u përplasën me një makinë Alfa Romeo ku udhëtonin dy shtetas italianë.
Në përplasjen e fortë veç dy të vdekurve u shënuan dhe pesë të plagosur, katër personat që gjendeshin te nënë e bir fatkeqë dhe një nga dy italianët.
Policia konfirmoi se ndër katër shqiptarët e plagosur, gjendet një grua 30 vjeçare shtatzënë, një djalë 7 vjeçar dhe një burrë 43 vjeçar si dhe një i katërt, 28 vjeç.
Asnjë nga emrat nuk është publikuar ende. Policia tha se të plagosurit u transportuan në spital ku ende nuk është e qartë nëse e kanë kaluar rrezikun për jetën.
j.s/NOA
