Prishtinë, 25 prill, NOA - Një sherr për të hyr në një lokal nate është kthyer në një incident të përgjakshëm mes dy të rinjve. Ngjarja ka ndodhur orët e para të mëngjesit në Prishtinë, ku si pasojë e sherrit ka mbetur i plagosur më armë zjarri punonjësi i sigurisë së lokalit.
Lajmi konfirmohet nga Policia e Kosovës e cila sqaron se viktima, punëtor i sigurimit në lokal, kishte ndaluar një të ri që të hynte në ambientet brendshme të lokalit të natës. Në këto momente personi, emri i të cilit nuk bëhet i ditur nga Policia e Kosovës, ka nxjerrë armën dhe ka plagosur me pistoletë rojen.
Por ngjarja nuk ka përfunduar me kaq. Edhe pse i plagosur, roja i lokalit e ka ndjekur nga pas autorin dhe madje ka arritur t'i marrë nga dora dhe pistoletën.
Policia e Kosovës sqaron se i plagosuri është dërguar në spital dhe personi që qëlloi me pistoletë është arrestuar.
m.xh/NOA
