Tiranë, 27 prill, NOA - Niveli i integritetit të politikanëve në Shqipëri duhet të rritet, ashtu siç duhet të ndodhë kjo edhe me nivelin e inteligjencës dhe aftësive vepruese të popullatës.
Një fakt të tillë e ka bërë me dije ish-presidenti Alfred Moisiu, gjatë fjalës që ka mbajtur në një konferencë të organizuar nga Dhoma Amerikane e Tregtisë, mbi integritetin e klasës intelektuale në tërësi.
"Gjithçka në këtë vend do të varet nga puna që do të bëjnë inteligjenca dhe politika shqiptare, duke rritur nivelin e integritetit të politikanëve dhe inteligjencën e popullatës në tërësi", tha ai.
Duke iu referuar citatit të Karterit se "Integriteti nënkupton bindjen e verbër ndaj diktatit të ndërgjegjies dhe një ndjenjë të lartë detyre", ish-kreu i shtetit shtoi se "integriteti nuk duhet njehsuar me ndershmërinë".
"Kjo pasi njeriu mund të jetë i ndershëm dhe pa qenë integral, pasi integriteti kërkon veprim, angazhim për të ushtruar presionin e duhur për të rregulluar atë që nuk shkon si duhet", sqaroi Moisiu.
Duke shtuar në fund, se integrimi kërkon edhe ndonjëherë shkeljen e rregullave, në të mirë të komunitetit.
n.e/NOA
