Durrës, 1 maj, NOA – Të favorizuar nga koha mjaft e mirë dhe sigurisht, nga festa e 1 Majit e nisja e fundjavës, shumë qytetarë i janë drejtuar sot zonës së Durrësit, duke “e bërë me shëndet” plazhin për këtë vit.
Në këtë mënyrë, duket se ka nisur para kohe sezoni i ri turistik, i cili zakonisht njeh një periudhë më të vonët të plazhistëve që bëjnë banjën e parë të diellit në plazhin e qytetit bregdetar.
Mjaft njerëz janë parë në bregun e detit jo vetëm duke shijuar të zhveshur me rroba banje diellit të ngrohtë, por shumë prej tyre kanë preferuar të bëjnë edhe banjën e parë.
Qytetarët që i janë drejtuar sot Durrësit kanë qenë kryesisht nga Tirana, por edhe Kosova e Maqedonia.
Ndërkaq, këta të fundit pritet të jenë edhe pushuesit kryesorë të kësaj vere në plazhin e Durrësit, ndërsa favorizohen edhe nga hapja e rrugës së re Durrës-Kukës.
n.e/NOA
