Tiranë, 4 maj, NOA – Ka hyrë sot në ditën e saj të pestë, greva e urisë së 22 deputetëve socialistë dhe dhjetëra mbështetësve të Partisë Socialiste, të cilët e kanë iniciuar atë në mbrëmjen e ditës së premte pas protestës në bulevardin “Dëshmorët e kombit”.
Ndërsa ditën e djeshme, deputetja socialiste, Klodiana Spahiu është transportuar në gjendje të rënduar shëndetësore në spital, sot po paraqitet e tillë edhe gjendja e disa grevistëve të tjerë.
E megjithatë, grevistët duket se janë të vendosur që ta vazhdojnë grevën e tyre, derisa sipas tyre, qeveria të reflektojë për kërkesat e tyre mbi transparencën e procesit të 28 qershorit.
Ndërkaq, ditën e djeshme, përmes një konference për shtyp, kryeministri Berisha la të kuptohet se nuk ka ndërmend të ndryshojë qëndrim nga ai i mbajtur deri më tani prej qeverisë, sipas së cilës, opozita duhet t’i drejtohet Kushtetueses ose Komisionit të Venecias për transparencën, por jo se mund të bëhet fjalë për hapjen e kutive të votimit.
n.e/NOA
