Ljubjanë, 6 maj, NOA – Klima politike në vend edhe më tutje ngelet problemi më i madh i Shqipërisë në rrugën drejt Bashkimit Evropian, në një kohë që ajo shënon një rritje ekonomike shumë më të mirë se shumica e vendeve të Evropës Lindore gjatë recesionit global kohëve të fundit.
Një fakt i tillë citohen në publikimin e radhës nga Dun & Bradstreet “International Risk & Payment Revieu”, cituar nga “Bonitetna Hiša I” në Slloveni e cila është partnere e këtij organizmi të njohur të informacionit tregtar dhe të biznesit në botë, prej 170 vjetësh.
“Me rritje reale të PBB-së prej 3 % në vitin 2009, është e qartë se Shqipëria u paraqit më mirë se vendet e rajonit të Evropës Lindore dhe ky elasticitet lidhet ngushtë me ekonominë shqiptare relativisht të mbyllur, që shihet qartë në raportin e eksporteve ndaj PBB-së (më pak se 10,0% në 2009) dhe në mbështetjen e vogël në sistemin bankar për financimin e tregut”, citon raporti në fjalë.
Duke shtuar se gjithsesi, ekziston një parashikimin se rritja reale e PBB-së do të jetë më e ngadaltë dhe rreth 2.5% për shkak të një zbutje të pritshme të kërkesës së brendshme. “Në veçanti, ne presim se papunësia më e lartë dhe një situatë e pafavorshme politike do të kufizojnë konsumin privat. Në të njëjtën kohë, një përqendrim më i madh në konsolidimin fiskal do të reduktojë impulsin e shpenzimeve qeveritare. Rimëkëmbja ekonomike globale do të jetë pozitive edhe për Shqipërinë, do të rrisë eksportet dhe paratë që dërgohen në shtëpi nga shqiptarët që punojnë jashtë shtetit”, shtojnë më tej ekspertët e “D&B”.
Në fund, ata shtojnë se gjithsesi, hyrja në Bashkimin Evropian është një objektiv kryesor i të dyja palëve, qeverisë dhe opozitës dhe “shpresojmë që presionet e mëdha të faktorit ndërkombëtar do të shërbejnë për një pajtim politik”.
n.e/NOA
