Durrës: 228 Milion Lekë Për Izolimin E Mbetjeve Kimike Në Porto Romano
DURRËS, 6 maj /ATSH-Gëzim Kabashi/ - Qeveria do të vazhdojë reabilitimin e zonës së ndotur nga mbetjet kimike të ish-kombinatit të ndërtuar në vitet 1980 në Porto Romano, 7 km në veri të qytetit të Durrësit.
"Një investim prej 228 milionë lekë i Bankës Botërore dhe qeverisë do të mundësojë ndërtimin e një kapsule nëntokësore për izolimin e afro 50 mijë metër kub mbetje lëndësh helmuese të bikromatit, lindanit dhe squfurit", tha sot gjatë ceremonisë së fillimit të punimeve ministri i Mjedisit, Pyjeve dhe Administrimit të Ujrave Fatmir Mediu.
Sipas tij, ky financim i hap rrugë reabilitimit përfundimtar të zonës, që vite më parë konsiderohej si më e ndotura në shkallë vendi. "Të gjitha investimet duhet të shkojnë në destinacion për përmirësimin e jetës së komunitetit", shtoi më tej Mediu.
Gjatë ceremonisë së përurimit, ministri i Punëve Publike, Sokol Olldashi, vlerësoi punën që bëhet për përmirsimin e infrastrukturës rrugore të zonës. Sipas tij, "me përfundimin e rrugës Durrës- Porto Romano dhe Shkozet- Porto Romano do të krijohet një unazë rrugore moderne që bashkon në pak kohë të gjitha pjesët e qytetit të Durrësit".
Kryetari i Bashkisë së Durrësit, Vangjush Dako dhe ministri Olldashi shprehën vullnetin e mirë për të bashkëpunuar në realizimin e projekteve të përbashkëta për pastrimin përfundimtar të zonës së Porto Romanos dhe krijimin e një zone të gjelbëruar të përbashkët, që përfshin edhe kurorën e kodrave në veri të qytetit.
Punimet që nisën sot nga një firmë finlandeze parashikohen të mbyllen në fund të janarit 2011. E njëjta shoqëri nordike ka zgjidhur pak kohe me pare edhe ndotjen e Azotikut te Fierit.
Kapsula nëntokësore që do të ndërtohet pranë oxhakut të ish-kombinatit kimik do të ketë formën e një vaske gjigante me trashësi 0.5 m, do të izolojë përfundimisht kimikatet që kanë ndotur një zonë prej 7.5 ha./ch/
