Tiranë, 6 maj, NOA – “Vazhdimi i grevës së urisë nga socialistët, po tregon se shpirti i opozitës po mbahet gjallë jo me ushqim, por me aspiratën për liri dhe për një politikë të re, që nuk mbahet peng me armët e politikës së vjetër”.
Kështu është shprehur në mitingun e radhës së opozitës poshtë godinës së Kryeministrisë, kreu i Partisë Socialiste Edi Rama, i cili ka vënë në dukje shqetësimin për gjendjen e rënduar të grevistëve të urisë sot në ditën e gjashtë të saj.
“Ky është turpi i Sali Berishës dhe pushtetit të tij, që nuk ka zemër të ndiejë problemet e këtij vendi dhe nuk ka veshë apo sy të dëgjojë dhe të shikojë mundimet e njerëzve të këtij vendi”, e vlerësoi ai zgjatjen e grevës së urisë, në kushtet kur qeveria nuk po kthen asnjë përgjigje ndaj kushteve të protestuesve.
Sipas tij, në një kohë kur opozita është në një betejë vetëmohuese për votën e lirë, qeveria jo vetëm që nuk po reagon, por po mban sehir duke qëndruar mbi kutitë e mbyllura.
n.e/NOA
