Elbasan: Komuniteti Ndërfetar Kërkon Ndërprerjen E Grevës Së Urisë
ELBASAN, 6 Maj /ATSH-Miranda Sadiku/ - Komiteti Ndërfetar i Elbasanit bëri thirrje të enjten që Partia Socialiste të ndërpresë grevën e urisë së deputetëve dhe anëtarëve të saj që zhvillohet prej disa ditësh në Tiranë.
Kryetari i Komitetit Ndërfetar, Sokol Lulgjuraj kërkoi me anë të një deklaratë ndërprerjen e shpejtë të grevës së urisë dhe protestave dhe zgjidhjen e kërkesës për transparencë të zgjedhjeve, konform Kushtetutës së Shqipërisë.
"Jemi tepër të shqetësuar për situatën që ka agravuar në këtë rrugë pa krye ku më se 200 njerëz janë fuur në grevë urie," thuhet në deklaratë.
"Duke ndjerë përgjegjësi para Zotit dhe besimtarëve nën frymën e librave të shenjtë, ftojmë palët që të zgjidhin menjëherë këtë konflikt për hir të të mirës së përgjithshme," thotë më tej deklarata./ch/
