Tiranë, 6 maj, NOA - Forumi i Krans Montanës do të zhvillojë edicionin e tij të ri në Tiranë dhe për këtë, është përshëndetur nga vetë kryeministri Sali Berisha.
Në një pritje të posaçme për organizatorët, themeluesi i këtij Forumi Jean Paul Carteron, duke marrë fjalën u shpreh se Shqipëria po ecën përpara pozitivisht, pavarësisht vështirësive të krizës botërore dhe se liderët në fushën e biznesit po kthejnë gjithnjë e më tepër sytë nga ky vend për të projektuar investimet e tyre.
Ndërsa kryeministri Berisha siguroi se qeveria shqiptare dhe të gjitha agjencitë e këtij vendi do të bëjnë më të mirën, për të mbështetur të gjithë investitorët e huaj në projektet e tyre, në mënyrë që atë të kenë një histori suksesi në këtë vend.
“Forumi i Crans Montana-s tashmë është bërë një traditë e përvitshme në Shqipëri. Ky forum i ka siguruar vendit tim një mbështetje shumë të rëndësishme, duke inkurajuar investitorët nga e gjithë Europa të konsiderojnë, të sjellin projektet e tyre në vendin tim”, tha Berisha mes të tjerash.
Më pas, ai shtoi se “pavarësisht shqetësimeve serioze që ekzistojnë sot në zonën euro, ekonomia jonë përfundimisht është një ekonomi e eurizuar, nuk jemi në zonën euro por jemi të eurizuar. Stabiliteti ynë makroekonomik u mbajt mirë, monedha jonë rezistoi më mirë se çdo monedhë tjetër në rajon”.
Në fund, shtoi se “Shqipëria nuk është një vend i madh, por është një vend me potenciale të mëdha”.
n.e/NOA
