Dibër, 07 Maj, NOA – Policia e Dibrës ka arritur të vërë në pranga pjesëtarët e një preje bandave që ka terrorizuar banorët e zonës gjatë kohëve të fundit. Bëhet fjalë për tre të arrestuar të cilët në periudha të ndryshme kohore kanë grabitur njerëzit në rrugët e zonës së Dibrës.
Sipas policisë të arrestuarit janë, Mirian Demir Laçi, 22 vjeç, lindur dhe banues në fshatin Brest i Poshtëm të Dibrës. Ndricim Demir Laçi, 20 vjeç lindur dhe banues në fshatin Brest i Poshtëm i rrethit Dibër si dhe Lamir Hashim Shehi, 24 vjeç, lindur dhe banues në fshatin Limjan të rrethit Dibër.
Arrestimi i tyre u bë gjatë operacionit të koduar “Shumbat”, të organizuar nga Drejtoria e Policisë së Qarkut Dibër dhe Drejtoria Kundër Krimeve të Rënda në Policinë e Shtetit.
Tre të rinjtë dyshohet se janë autorët e të paktën tre vjedhjeve të ndodhura në fshatin Shumbat të Dibrës në datën 16 prill të këtij viti.
Sipas policisë në të njëjtë ditë ata nën kërcënimin e armëve të zjarrit i kanë vjedhur një sasi prej 13.000 lekësh të reja, si dhe një aparat celular një personi tjetër. Po ashtu, gjatë kësaj dite, në vendin e quajtur “Prroi i Kapshit”, në afërsi të fshatit Rrenx të rrethit Dibër, po nën kërcënimin e armëve të zjarrit, i kanë vjedhur një tjetër shtetasi një sasi prej 2.500 lekësh të reja.
Policia sqaron se po në vendin e quajtur “Prroi i Kapshit”, nën kërcënimin e armëve të zjarrit kanë tentuar të vjedhin pasurinë e shtetasit Laim Muça.
Pas arrestimit të tyre policia ka sekuestruar dhe disa maska që përdoreshin për grabitje, 5 aparate celular, një sasi të konsiderueshme municioni luftarak si dhe një çiklomotorr.
Ndërkohë që policia sqaro se po punohet edhe për dokumentimin e vjedhjeve të tjera për të cilat dyshohen se janë autorë këta persona.
m.xh/NOA
