Talasemia, Problem Social, Që Kërkon Bashkëpunimin E Të Gjithëve
TIRANË, 7 Maj/ATSH-Eriola Çuko/ - Talasemia është një problem sa shëndetësor, aq dhe social- psikologjik e familjar, ndaj kërkon ndërhyrjen dhe bashkëpunimin e të gjithëve për të mbështetur fëmijët që vuajnë nga kjo patologji.
Në Ditën Botërore të Talasemisë, ministria e Shëndetësisë, nën kujdesin e znj. Liri Berisha, në bashkëpunim me Universitetet "Zoja e Këshillit të Mirë" dhe "Tor Vergeta" në Romë (Itali), organizuan sot konferencën "Parandalimi i sëmundjes së talasemisë dhe siguria në mjekësinë transfusionale".
Një problem të mprehtë, shëndetësor, social për një pjesë të popullisë, një sfidë për sektorin social shqiptar, e cilësoi përballjen me këtë patologji, kryetari i Komisionit Parlamentar për Shëndetësinë, Tritan Shehu.
Ai u ndal në përpjekjet për të përmirësuar nivelin cilësor të shërbimit, me qëllim, krijimin e hapësirave të reja thellësisht parandaluese për përballimin e sëmundjes, që në mënyrë organike lidhet me probleme të gjakut.
Ministri i Arsimit dhe Shkencës, Myqerem Tafaj, tha se "MASH është pjesëmarrëse e strategjisë të luftimit të talasemisë për të mbështetur fëmijët, të rinjtë që vuajnë nga sëmundja, si dhe prindërit". Sipas tij, në kuadër të startegjisë të politikave arsimore për mbështtjen e fëmijëve që vuajnë nga sëmundja, mësuesit, edukatorët e kopshteve trajtojnë me përparësi fëmijët që vuajnë nga talasemia.
"Për ne është shumë e rëndësishme që t'u krijojmë, t'u ofrojmë të gjithë mbështjen në mënyrë që të kenë mundësi të frekuentojnë shkollat në të gjitha nivelet në mënyrë të sukseshme e të arrijnë rezultate që dëshirojnë", tha Tafaj.
Për lehtësimin dhe kurimin e kësaj sëmundjeje, punë shumë të madhe bën Fondacioni i Fëmijëve Shqiptarë "Domenick Scaglione", i drejtuar nga znj. Liri Berisha. Prej shumë vitesh ky fondacion ka bashkëpunuar ngushtë me MSH, me departamentin e Homoglobipatisë në Qendrën Spitalore Universitare "Nënë Tereza" në Tiranë, Qendrën Kombëtare të Transfuzionit të Gjakut, Kryqin e Kuq Shqiptar dhe Shoqatën e Talasemikëve.
E pranishme në konferencë, znj. Berisha tha se "duke u njohur me problematikën familjare dhe të personave që merrnin mjekimin, në bashkëpunim me mjekët dhe Shoqatën e Talasemikëve kemi lobuar në mënyrë të vazhdueshme në instutucionet e Qeverisë për të rimbursuar preparatin 'Exjade', që shteti e rimburson 100 % që prej vitit 2005, duke sjellë lehtësi të jetës për pacientët dhe familjet e tyre".
Një angazhim plus i Fondacionit në bashkëpunim me MSH, sipas saj, është ngritja e qendrës së dytë të trajtimit të homoglobipative në qytetin e Lushnjes, e pajisur me laboratore dhe aparatura bashkëkohore për të ekzaminuar dhe ndjekur pacientët, duke u ardhur në ndihmë kështu jo vetëm qytetit të Lushnjes, por dhe atyre të rriskuar në jug të vendit. Rehabilitimi dhe pajisja e qendrës u sigurua nga Fondacioni i mbështetur nga biznesi vendas.
"Fondacioni ka vijuar me lobime për dhurimin e gjakut, produkt mjaft jetik për këta pacientë. Fushata "Dhuro për jetën", në bashkëpunim me MSH, MASH, etj u shtri gjerësisht me angazhimin e gjithë popullatës sidomos të rinjve", tha znj. Berisha. Ajo bëri të ditur prezantimin e punës që ka bërë ky Fondacion në konferenca dhe takime brenda dhe jashtë vendit, si Rumani, Katar, Qipro.
Në Qipro, me ftesë të Zonjës së Parë, përfaqësuesit e Fondacionit u bënë pjesë e takimit për themelimin e rrethit të personaliteteve të shqura për ndërgjegjësimin e shoqërisë mbi çrregullimet e homoglobipatisë si dhe u përzgjodh si një nga anëtarët e grupit nismëtar, që ka objektiv, mbështetjen e përpjekjeve të Federatës ndërkombëtare në rritjen e ndërgjegjësimit të çrregullimit të homoglobipative, parandalimit dhe ngritjes në shkallë maksimale të kujdesit, nënvizoi znj. Berisha./n.m/
