Tiranë, 8 Maj, NOA - Pothuajse në të gjitha rrethet e vendit, tashmë po kthehet në fenomen, braktisja e shkollës nga fëmijët, të cilët detyrohen të punojnë për të ndihmuar familjen.
Ministria e Punës ende nuk ka të dhëna të plota në rang vendi, por ky fenomen bën që shumë fëmijë për të siguruar të ardhura, privohen nga mundësia për arsimim.
Sipas një studimi të kryer nga Ministria e Arsimit dhe Shkencës për shkaqet që favorizojnë analfabetizmin në vendin tonë, në bashkëpunim me UNICEF dhe shoqatën “Save the Children” braktisja e shkollës, për shkak të punës që kryejnë fëmijët, është më e hasur në komunitetin rom dhe atë egjiptian.
Nga studimi rezultoi se fëmijët romë që punojnë i përkasin moshës 3- 16 vjeç dhe përbëjnë rreth 4654 fëmijë.
Shqipëria ka ratifikuar konventa kryesore të ILO dhe të gjitha konventat e organizatave ndërkombëtare në lidhje me të drejtat e fëmijëve dhe shfrytëzimin e tyre. Në mbështetje të tyre ka edhe akte ligjore dhe nënligjore të hartuara gjatë gjithë këtyre viteve.
Gjatë kontrolleve që ka ushtruar Inspektoriati Shtetëror i Punës gjatë vitit 2009 janë evidentuar 415 fëmijë të punësuar.
Fëmijët e evidentuar në punë gjatë kontrolleve rezultojnë të jenë kryesisht vajza ose 78.7% e fëmijëve në punë.
Duke analizuar marrëdhëniet e punës të fëmijëve të evidentuar rezultojnë se 12% e tyre janë gjetur pa kontrata individuale pune. Pjesa tjetër kanë kontratë
dhe punojnë 6 orë në ditë dhe me një kohëzgjatje javore pune 30-36 orë.
b.a/NOA
