Tiranë, 8 Maj, NOA - Çmimet e karburanteve janë shtrenjtuar ndjeshëm duke u afruar 150 lekë për litër, ndërkohë që një vit më parë çmimi arrinte në 125 lekë. Kohët e fundit vërehet një rritje prej 5-10 lekë për litër, si për naftën edhe për benzinën.
Aktualisht, një litër naftë e një cilësie të mirë në tregun vendas ka arritur të tregohet me mbi 140 -145 lekë, ndërkohë një litër benzinë shitet edhe më shtrenjtë 148 lekë.
Kjo situatë ka ardhur si pasojë e forcimit të monedhës amerikane, e cila kohët e fundit ka filluar të kuotohet në mbi 100 lekë. E nëse forcimi i dollarit do të vijojë përballë euros atëherë edhe çmimi karburanteve do të kap në të tjera nivele.
Shtrenjtimi i karburanteve pritet të rrisë kostot në disa sektorë si transporti, industria e prodhimit etj, e për rrjedhojë do të kemi edhe rritje të inflacionit. Aktualisht në tregun ndërkombëtar një fuçi nafte shitet me 85 dollar.
Analistët janë të mendimit se rigjallërimi i ekonomisë amerikane po bën të mundur një stimulim të kërkesës për naftë, për rrjedhojë shtrenjtim të çmimeve. Kjo do të thotë se mbaroi koha e çmimeve disi të ulta të karburanteve.
r.l/NOA
