Shba Paralajmërojnë Izraelin Dhe Palestinezët Lidhur Me Bisedimet Indirekte
UASHINGTON, 9 maj /ATSH-AFP/ - Shtetet e Bashkuara i paralajmëruan sot Izraelin dhe palestinezët për rrezikun e akteve që do të dëmtonin besimin në Lindjen e Mesme, pas njoftimit të hapjes së bisedimeve indirekte mes dy palëve.
"Siç e dinë të dy palët, nëse njëra ose tjetra merr masa gjatë këtyre bisedimeve të cilat, sipas nesh, do të dëmtonin rëndë besimin, do të reagojmë duke i bërë përgjegjëse ato, në mënyrë që bisedimet të vazhdojnë", deklaroi në një komunikatë zëdhënësi i Departamentit të Shtetit, Philip Crowley.
Crowley deklaroi se seria e parë e bisedimeve indirekte e filluar në rajon nga i dërguari amerikan George Mitchell ishte "serioze dhe e gjerë".
"Të dyja palët po bëjnë disa gjeste që ndihmojnë në krijimin e një atmosfere të favorshme për bisedime të suksesshme", vazhdoi zëdhënësi, duke shtuar se Uashingtoni këmbëngul të "përgëzojë" si kreun e Autoritetit palestinez Mahmud Abas dhe kryeministrin izrelit Benjamin Netanjahu të cilët po përpiqen të avancojnë në rrethana të vështira.
/I.Pu.
