Durrës, 10 maj, NOA – Me një pasaportë kosovare, në të cilën ndodhej e stampuar një vizë sllovene e falsifikuar, një kosovar donte të kalonte kufirin shqiptar, përmes Portit të Durrësit në mënyrë të paligjshme.
Por ai është pikasur menjëherë nga forcat e policisë së Portit të Durrësit, duke e arrestuar në flagrancë kosovarin e lartpërmendur, i cili mban emrin Sherif Popaj, është 21-vjeç dhe rezulton të jetë banor i komunës së Rahovecit në Kosovë.
Arrestimi i tij u bë pasi u kap konkretisht në terminalin e pasagjerëve të Portit të Durrësit, duke tentuar të kalojë kufirin në mënyrë të kundraligjshme për në Itali me një nga tragetet e linjës Durrës-Bari.
Nga ana e policisë u kryen veprimet e nevojshme proceduriale dhe materialet për veprën penale të falsifikimit të letërnjoftimeve, pasaportave apo vizave iu kaluan për ndjekje prokurorisë së Durrësit.
n.e/NOA
