Ekonomi - Rehn: Franca Dhe Italia Duhet Të Zvogëlojnë Deficitet
BERLIN, 11 maj /ATSH-AFP/ - Franca dhe Italia, ashtu si dhe Portugalia dhe Spanja, kanë një borxh të lartë dhe duhet të zvogëlojnë deficitet e tyre buxhetore, paralajmëroi sot komisioneri evropian për Çështjet ekonomike.
"Spanja dhe Portugalia kanë qenë objektiv i spekulimeve. Por, kjo erdhi edhe si pasojë e situatës ku ato ndodhen, ato duhet të shëndoshin financat e tyre publike", deklaroi komisioneri Olli Rehn në të përditshmen e Berlinit "Tagesspiegel". "Por, edhe vende të tjera duhet të bëjnë më tepër përpjekje për të zvogëluar deficitet e tyre", shtoi ai, duke përmendur Italinë dhe Francën.
"Italia nuk ka miratuar një program të gjerë rimëkëmbjeje ekonomike. Por niveli i borxhit të saj është shumë i lartë, prandaj ajo duhet të shtojë përpjekjet për riekuilibrimin e buxhetit. Franca duhet të bëjë gjithashtu më tepër përpjekje".
Kjo do të jetë një nga temat e bisedimeve në këshillin e ministrave të Financave të Bashkimit Evropian më 18 maj, paralajmëroi Rehn.
Portugalia dhe Spanja janë angazhuar dje për marrjen e masave të rrepta ekonomike për zvogëlimin e deficiteve të tyre në vitet 2010 dhe 2011, paralelisht me miratimin e një plani të gjerë të mbrojtjes së euros nga BE-ja dhe Fondi Monetar Ndërkombëtar.
/I.Pu.
