Al-Kaida Merr Përsipër Sulmin Kundër Ambasadorit Britanik Në Jemen
UASHINGTON, 12 maj /ATSH-AFP/ - Al-Kaida në Gadishullin Arabik, AQAP, mori përsipër përgjegjësinë në atentatin e dështuar kundër autokolonës së ambasadorit britanik në Jemen më 26 prill, në një komunikatë të publikuar në disa faqe islamike interneti, njoftoi qendra e mbikëqyrjes së tyre SITE.
Ambasadori Timothy Torlot shpëtoi nga ky sulm i ndërmarrë nga një kamikaz i cili u hodh kundër autokolonës së tij ndërkohë që ndodhej rreth 600 metra nga ndërtesa e kancelarisë.
AQAP identifikoi kamikazin me emrin Othman Nouman al-Salawi, duke konfirmuar informacionet e policisë jemenase dhe publikoi fotografinë e tij, njoftoi faqja e mbikëqyrjes së faqeve islamike të internetit SITE.
Sipas komunikatës, kamikazi i përkiste "brigadës së sheikut Abu Omar al-Bagdadi", njëri nga shefat kryesorë të Al-Kaidës në Irak, i vrarë më 18 prill gjatë operacioneve të përbashkëta amerikano-irakiane në veri të Bagdadit.
Atentati kundër autokolonës së ambasadorit shkaktoi tre të plagosur mes kalimtarëve dhe kancelari është mbyllur për rreth dy javë.
Ministria e Brendshme e Jemenit është shprehur se atentati mbante vulën e Al-Kaidës.
Ndërsa, Departamenti i Shtetit i përfshiu dje dy zyrtarë të lartë të AQAP-it në listën e anëtarëve të një organizate terroriste, mësohet nga një komunikatë.
/I.Pu.
