Durrës: Moratoriumi I Skafeve Do Të Vazhdojë Kundër Trafiqeve Kriminale
DURRES, 17 maj /ATSH-Gëzim Kabashi/.- "Qeveria shqiptare nuk do të dobësojë qëndrimin ndaj moratoriumit të skafeve, pasi ato janë faktuar si industri kriminale e mafias", tha sot në Durrës Kryeministri Sali Berisha gjatë ceremonisë së përurimit të Qendrës së përbashkët të kontrollit të hapësirës detare.
Pasi vlerësoi punën e muajve të fundit në këtë Qendër në "bllokimin e sasive të mëdha të ngarkesave kriminale", Berisha theksoi se "moratoriumi do të vazhdojë të zbatohet dhe Adriatiku do të kthehet në rajon sigurie në bashkëpunim edhe me rojet bregdetare të vendeve fqinje".
Sipas tij, "brigjet e Adriatikut po përballen kryesisht me trafiqet e paligjshme nga vendet e Lindjes, por në bashkëpunim me Malin e Zi, Kroacinë, Slloveninë, Italinë dhe Greqinë ne do ta kthejmë atë në një det të pastër sigurie dhe qetësie".
Sistemi i radarëve të vendosur në bregdetin shqiptar me një investim prej 2.4 miliard lekë po mundëson përmbushjen e standarteve evropiane, nënvizoi kryeministri Berisha./n.m/
