Tiranë, 17 maj, NOA - Kontrata e firmosur shtatë vite më parë për ndërtimin e një linje hekurudhore, Tiranë-Durrës me tren elektrik, ka bërë që Ministria e Transporteve të padisë ish-ministrin që firmosi kontratën, Spartak Poçi.
Sipas njoftimit të ministrisë së Transporteve, gjoba prej 12 milionë dollarësh që i duhet të paguajë shteti shqiptar për prishjen e kontratës me “General Electrics Transportation System, Athena" (ILIRIA Consortium) S.a, ka ardhur si vendimeve të ish-ministrit Poçi.
Vendimi i Ministrisë së Transporteve ka ardhur pas vendimit të Gjykatës Ndërkombëtare të Arbitrazhit IË në Romë e cila fajëson shtetin shqiptar për prishjen e kontratës. Pas kësaj, ministria “ka depozituar në Prokurorinë e Rrethit Gjyqësor Tiranë dhe në dijeni të Prokurorit të Përgjithshëm të Republikës zj.Ina Rama, kallëzimin penal ndaj ish Ministrit të Transportit dhe Telekomunikacionit z. Spartak Poçi, për veprën penale të shpërdorimit të detyrës, e kryer gjatë komunikimit të Ministrit Poçi me subjektin “General Electrics Transportation System, Athena" (ILIRIA Consortium) S.a, për shkak se ka dyshime të arsyeshme, në kryerjen e një krimi i cili kushton sot të paktën 12 milion euro, Shtetit Shqiptar, faturë e cila rritet çdo ditë për shkak të interesave”, thuhet në njoftimin e Ministrisë së Financave.
Nga ana tjetër ministria sqaron se “komunikimi që mban firmën e z.Poçi, dhe mosparaqitja e tij personalisht në gjykimin e Arbitrazhit sipas rregullave proceduriale për të dhënë sqarimet e nevojshme në lidhje me këtë komunikim të paraqitur nga “General Electrics Transportation System, Athena" (Iliria Consortium) S.a, kanë qenë të rëndësishme për vendimin”.
Objekti i gjykimit të Gjykatës së Arbitrazhit ka qenë kontrata e datës 15 shtator 2003, për modernizimin e seksioneve të Hekurudhës Tiranë-Durrës dhe Aeroportit Rinas.
“Ministri i Punëve Publike dhe Transportit i kërkon Prokurorisë të hetojë këtë krim, që penalizon pa të drejtë buxhetin e shqiptarëve dhe dëmton interesat ekonomike të shtetit”, thuhet në njoftimin e Ministrisë së Transporteve.
m.xh.NOA
