Kozani, 17 Maj 2010 NOA – Një emigrant shqiptar ka humbur jetën pasi është qëlluar egërsisht nga tre persona të tjerë, gjithashtu shqiptarë, duke lënë jetimë dy fëmijët e tij të mitur, raporton korrespondenti i agjencisë NOA.
Viktima është një 30 vjeçar shqiptar i cili jetonte prej vitesh në zonën e Kozanit në Greqi.
Autorë të dyshuar të vrasjes së kryer në bashkëpunim, janë tre të rinj gjithashtu shqiptarë të cilët janë larguar nga vendi i ngjarjes dhe tani po ndiqen nga policia.
Dyshimet e para sipas policisë, bien mbi një larje hesapesh, por të dhëna më të detajuara ende nuk jepen.
I ndjeri, u gjet në grahmat e fundit të jetës, i shtrirë në pellg gjaku në një rrugë dytësore pranë lokalitetit Aiani në Kozan.
Në atë gjendje ai u dërgua nga policia e njoftuar nga kalimtarët, në spitalin Mamatçio të Kozanit, ku pak minuta më vonë ndërroi jetë, megjithë ndërhyrjen e mjekëve.
Mjekët thanë se viktima kishte marrë plagë të rënda në trup nga goditjet që kishte pësuar dhe organet e tij vitale ishin dëmtuar fatalisht.
Viktima prej kohësh punonte në pronën e një greku, fushë kultivimi duhani në Aiani. në momentet kur ai ishte qëlluar dhe autorët ishin larguar me të shpejtë, kishte arritur të telefononte me celularin e tij kushëririn duke i kërkuar ndihmë me zë të mekur.
Kushëriri ka mbërritur por pa mundur të ndihmojë të afërmin e tij që të shpëtojë. Ai ka dëshmuar për policinë e Kozanit se një ditë para vrasjes, 30 vjeçari ishte përballur me tre djem shqiptarë ku njëri prej tyre e kishte goditur dhe më pas që të gjithë ishin shpërndarë.
Policia e Kozanit tha se është vënë në ndjekje të autorëve të masakrës. Mësohet se në arrati e sipër, të dyshuarit kanë vjedhur dhe makinën e një greku.
n.s/r.n/NOA
