Studentët Peticion Kundër Grevës Së Opozitës
- Deri tani janë plot 7000 studentë që kanë firmosur peticionin -
TIRANË, 18 Maj /ATSH- Gjergji Mima/ - Këshilli Kombëtar Studentor (KKS), prej dy ditësh ka iniciuar një peticion të studentëve shqiptarë në të gjitha universitetet publike dhe private të vendit kundër grevës së opozitës në Bulevardin "Dëshmorët e Kombit", që sipas tyre, po dëmton proçesin e integrimit të Shqipërisë në Bashkimin Europian si dhe proçesin e liberalizimit të vizave.
Me anë të një deklarate për shtyp, kryetarit i KKS-së, Qamil Dika, theksoi se "studentët me firmat e tyre po dëshmojnë që iniciativat e opozitës janë të pashpresa dhe të papërgjegjshme".
Sipas Dikës, "deri tani janë plot 7000 studentë, që kanë firmosur peticionin, ku i bëjnë thirrje kryetarit të Partisë Socialiste dhe njëkohësisht kryetar i Bashkisë së Tiranës, Edi Rama, që të mos pengojë ëndrrën e të rinjve shqiptarë për të udhëtuar të lirë nëpër Europë".
"Mos pengoni lëvizjen e lirë të studentëve dhe të çdo shqiptari tjeter. Mos u mundoni me tentativa të panumërta të pengoni proçesin e pandalshëm të integrimit të Shqipërisë në Bashkimin Europian dhe vlerat që ajo perfaqeson", shkruhej në peticionin e studentëve
Sipas KKS-së, ky peticion do të vazhdojë të firmoset nga studentët edhe në ditët në vazhdim./s.s./
