Informatikë - Be Gjobit Me Më Shumë Se 331 Milionë Euro Prodhuesit E Mikroçipëve
BRUKSEL, 19 maj /ATSH-ANSA/ - Komisioni i Bashkimit Evropian ka vendosur një gjobë prej më shumë se 331 milionë euro një grupi me dhjetë kompani që prodhojnë Dram, një lloj memorie informatike që përdoret në kompjuterë personalë dhe serverë. Gjoba është vendosur për shkak se këto kompani kanë rënë në ujdi për të caktuar çmimin e këtyre pjesëve kompjuterike.
Shoqëritë e gjobitura nga Brukseli janë: Micron, Samsung, Hynix, Infineon, Nec, Hitachi, Mitsubishi, Toshiba, Elpida dhe Nanya. Shuma totale e gjobës u reduktua me 10 për qind pasi të gjitha shoqëritë e përfshira e pranuan fajin. Çmimin më të lartë do ta paguajë kompania Samsung, me më shumë se 145 milionë euro. Ndërsa kompania Micron nuk do të paguajë asnjë qindarkë sepse ishte pikërisht ajo që denoncoi "aleancën" e jashtëligjshme.
/e.v/
