Tiranë, 20 maj, NOA – Partia Socialiste ka falënderuar sot gjithë qytetarët që i dhanë mbështetjen asaj gjatë ditëve të grevës së urisë dhe protestave.
Deputeti i PS-së, Blendi Klosi, në një deklaratë për media u shpreh se pas protestave, Partia Socialiste ndjehet më afër problemeve të qytetarëve.
Por pa nisur ende negociatat në Strazburg, Klosi, theksoi se Partia Socialiste është e bindur në vazhdimin e betejës së saj për transparencë të zgjedhjeve.
“Sot opozita shqiptare është akoma edhe më e bashkuar, akoma dhe më e vendosur për t’i shkuar çështjes së transparencës deri në fund”, tha Klosi.
Klosi theksoi se falë aktivitetit të 3 javëve të fundit, aktiviteti opozitar ka hyrë në një fazë të re. “Opozita sot është më pranë njerëzve, më afër problemeve të tyre”, u shpreh Klosi.
Deputeti i PS-së ka theksuar se tashmë “opozita ka mbështetjen e mbi 1 milion shqiptarëve”. Kjo mbështetje, sipas Klosit do ta çojë deri në fund “kauzën e zgjedhjeve të lira dhe të ndershme”.
m.xh/NOA
