Bruksel, 21 maj, NOA – Është koha për të gjetur një zgjidhje mbi krizën e tanishme politike në Shqipëri, e cila duhet të jetë e qëndrueshme dhe të shpejtë, në përputhje me aspiratat e qytetarëve të këtij vendi, Kushtetutën e tij dhe parimin e transparencës.
Një fakt të tillë e kanë bërë me dijeni autoritetet e larta evropiane, Catherine Ashton, komisionere e Jashtme e Bashkimit Evropian dhe Stefan Fule, komisioner për Zgjerimin dhe Politikat e Fqinjësisë; në një deklaratë të përbashkët në kuadrin e negociatave Rama-Berisha, me ndërhyrjen e Brukselit zyrtar.
Ata kanë përshëndetur nismën e europarlamentarëve Joseph Daul dhe Martin Schulz, që në emër të grupeve të tyre parlamentare që përfaqësojnë në PE, kanë dhënë kontributin në inkurajimin e përmirësimeve efektive të situatës politike në Shqipëri për të mirën e qytetarëve si edhe me qëllimin e përmirësimit të perspektivës evropiane të këtij vendi.
Duke nënvizuar pikërisht se “Shqipëria është në një moment vendimtar në rrugën e saj drejt integrimit në BE”, e pikërisht për këtë, një sërë sfidash të saj të brendshme politike, kërkojnë kurajo.
“BE-ja është e shqetësuar seriozisht për bllokimin e vazhdueshëm politik të situatës në këtë vend, si dhe për parlamentin jofunksionale, prandaj vlerësojmë se është koha për të gjetur një zgjidhje për krizën e tanishme në një bazë që i qëndron perspektivës së Shqipërisë”, përfundon deklarata e përfaqësuesve të lartë të Bashkimit Evropian,
Catherine Ashton dhe Stefan Fule.
n.e/NOA
