Meta: Dialogu Politik, Ne Favor Te Integrimit Te Vendit
TIRANË, 21 Maj/ATSH/.- Zëvendëskryeministri dhe ministri i Jashtëm Ilir Meta ka deklaruar për mediat shqiptare, se "është e rëndësishme mbyllja e grevës", ndërsa është shprehur i sigurt "për një zgjidhje të ngërçit midis pozitës dhe opozitës shqiptare".
Për Zv.kryeministrin dhe ministrin e Jashtëm, është e rëndësishme që së fundi nisi dialogu, e cila sipas tij "do të çojë në një përfundim të suksesshëm të ngërçit, në favor të integrimit".
Duke folur për Rezolutën e Organizatës së Konferencës Islamike për njohjen e pavarësisë së Kosovës, Meta tha se "miratimi me konsensus i rezolutës për Kosovën nga Konferenca Islamike tregon shumë qartë se, opinioni ndërkombëtar gjithnjë e më shumë po ndërgjegjësohet me progresin që ka ndodhur në Kosovë, sidomos gjatë vitit të fundit dhe në përgjithësi pas shpalljes së pavarësisë".
Zv.kryeministri shprehu bindjen e plotë se "do të vijojnë njohje të tjera ndërkombëtare, ashtu sikurse ka ndodhur edhe kohët e fundit, pasi pavarësia e shtetit të ri të Kosovës është futur në një rrugë të pakthyeshme, pavarësisht nga sfidat që ende nuk janë të pakta". /e.p.//n.m/
