Strasburg, 21 maj, NOA Update – Ka vazhduar për rreth 5 orë, por pa arritur ndonjë kompromis konkret, e për këtë arsye është caktuar një afat dy-javor si mundësi që gjatë kësaj kohe, të shqyrtohen të gjitha rrugët e duhura për zgjidhjen e krizës politike në Shqipëri.
Kjo ka qenë pak a shumë rezultantja e diskutimeve të gjata që janë bërë duke u gdhirë dita e sotme në restorantin “Crocodil” të Strasburgut në Francë, mes dy liderëve kryesorë politikë shqiptarë, si edhe një përfaqësie të lartë evropiane pranë tyre për ndërmjetësim.
Kjo e fundit përbëhej përkatësisht nga krerët e grupeve parlamentare kryesore në Parlamentin Evropian, Joseph Doul i të djathtëve dhe Martin Schutlz nga të majtët; së bashku me komisionerin evropian për Zgjerim, Stefan Fule.
Mësohet se palëve u është dhënë kohë për reflektim, rreth dy-javor, deri në zhvillimin e një takimi të ardhshëm, gjatë të cilit të mundësohet arritja e një zgjidhje të duhur për zhbllokimin e ngërçit politik të krijuar që prej zgjedhjeve të 28 qershorit 2009.
Nga ana e tij, komisionari i BE-së për Zgjerimin, Stefan Füle e vlerësoi takimin e mbrëmshëm tek restorant “Crocodil” si të mirë , por që gjithsesi, ka ende shumë për të bërë, e megjithatë, notat optimiste për gjetjen e zgjidhjeve janë shfaqur dukshëm prej tij.
Ndërkaq, burime nga pranë takimit, bëjnë me dijeni se gjithsesi, pala evropiane nuk e ka mbështetur variantin e hapjes së kutive, të kërkuar nga opozita, duke kërkuar rrugë të reja për zgjidhjen e problemeve të krijuara mes palëve në Shqipëri.
n.e/NOA
