Sarande: Krijohet Dega E Shoqates Shqiptare Te Turizmit
SARANDË, 22 Maj/ATSH-Telnis Skuqi/ - Nga sot, biznesi turistik në qytetin e Sarandës do të ketë degën e vet rajonale të Shoqatës Shqiptare të Turizmit.
Bashkim Tola, nënkryetar shoqatës të sapokrijuar, tha sot për ATSH-në se, qëllimi kryesor i saj është mbrojtja e interesave të anëtarëve të vet, si dhe bashkëpunimi me pushtetin vendor.
"Tashmë, hotelierët dhe pronarët e restoranteve do të jenë të organizuar në degën e tyre për të diskutuar e zgjidhur problemet që mund të dalin gjatë veprimtarisë turistike", tha Tola, duke theksuar se shoqata përfshin edhe rajonin e Gjirokastrës.
Shoqata Shqiptare e Turizmit (ATA) është krijuar më 29 prill 2008 si shoqatë e bizneseve turistike dhe bazohet në sektorët e akomodimit, restoranteve dhe agjencive të udhëtimeve.
ATA monitoron zhvillimet në Shqipëri, mban lidhje të ngushta me anëtarët dhe ka shkëmbime periodike me institucionet ndërkombëtare të turizmit. /a.ke/
