Durrës: Kushte Të Mira Atmosferike, Lundrime Normale
DURRES, 23 maj /ATSH-Gëzim Kabashi/.-Moti i mirë po karakterizon sot rajonin detar të Durrësit, ndërsa kushtet detare të favorshme mundësojnë lundrimin normal të trageteve, anijeve dhe motopeshkatoreve.
Burime të kapitenerisë së Portit bëjnë të ditur për ATSH-në, se tre tragetet e linjës Bari-Durrës që lundruan gjatë natës nga porti italian i Barit janë ankoruar në kalatat.
Ndonëse ditë pushimi, mbi 20 motopeshkatore janë nisur në gjueti në zonën detare nga grykëderdhja e lumit Seman deri në atë të Bunës në veri, u shprehën burimet e kapitenerisë.
Era sot do të fryjë e lehtë nga perëndimi duke ndikuar në qëndrueshmërinë e motit të mirë./n.m/
