Ulen Çmimet E Artikujve Bujqësorë Sezonalë
TIRANE, 23 Maj /ATSH/- Çmimet e artikujve kryesorë ushqimorë në fund të kësaj jave në tregjet e vendit shënuan rënie, në krahasim me javën e shkuar, bënë të ditur sot burime nga ministria e Bujqësisë, Ushqimit dhe Mbrojtjes së Konsumatorit.
Rritja e prodhimit bujqësor vendas gjatë këtij sezoni, ka sjellë gradualisht uljen e çmimeve të këtyre produkteve në tregjet e vendit.
Sipas statistikave të dikasterit të bujqësisë, çmimet e rreth 35 përqind të artikujve bujqësore, kryesisht të perimeve, si domate, kastravec, speca, kunguj etj kanë vazhduar të ulen, përkatësisht në 50 lekë/kg, 60 lekë/kg, 120 lekë/kg dhe 65 lekë/kg. Ndërsa me rritje të çmimit rezultojnë prodhimet që janë në fillim të sezonit dhe një pjesë e prodhimeve të importit, ku kryesojnë frutat me nje rritje prej 4,5 leke/kg.
Po sipas të njëjtit burim, për produktet e tjera në grupin e ushqimeve mish, bulmet dhe ushqime të importit si, vaj, makarona, etj, gjatë kesaj jave është ruajtur i njejti nivel çmimi sa një javë më parë.
Këtë javë perimet u shitën më lirë në qytetet e Lushnjës dhe Fierit.
Referuar informacionit zyrtar, rezulton se në shkallë vendi ka një rritje të prodhimit të përgjithshëm bujqësor dhe blegtoral, e cila e kordinuar dhe me faktorin sezonal, ka ndikuar në uljen e çmimit të shitjes së tyre. /e.xh//n.m/
