Durrës: Mot I Paqëndrueshëm, Kushte Të Mira Detare
DURRËs, 24 maj /ATSH-Gëzim Kabashi/.- Sot në rajonin detar të Durrësit do të mbizotëroje moti i paqëndrueshëm, ndërsa kushtet detare të favorshme do të mundësojnë lundrimin normal të trageteve, anijeve dhe motopeshkatoreve, bënë të ditur për ATSH-në burime zyrtare nga kapiteneria e portit.
Tre tragetet e linjës Bari-Durrës, që kanë lundruar gjatë natës nga porti italian, janë ankoruar në kalatat përkatëse në orët e para të mëngjesit, ndërsa do të vijojnë lundrimet e katamaranit San Guan, i cili udhëton brenda ditës në linjën Durrës- Bari e kthim.
Mbi 35 motopeshkatore janë nisur nga poti detar i Durrësit në gjueti në zonën detare nga grykëderdhja e lumit Seman deri në atë të Bunës në veri, thanë burimet e kapitenerisë. Përpunimi i mallrave nga anijet tregtare nuk është ndërprerë as ditën e dielë, ndërsa sot pritet të ankorohen në kalata edhe dy anije të tjera me kontejnerë.
Era vazhdon të fryjë e lehtë nga veriperëndimi, duke ndikuar në përmirësimin e kushteve atmosferike. Ndërkaq temperaturat e ajrit vazhdojnë të jenë nën mesataren stinore, përfunduan burimet e kapitenerisë së portit më të madh të vendit./s.s./
