Tiranë, 24 maj, NOA – Zëvendëskryeministri dhe Ministri i Jashtëm, Ilir Meta ka hedhur poshtë deklaratat se ai ka qenë negociatori i draftit për zgjedhjen e krizës mes PD dhe PS. Ekzistenca e një dokumenti të tillë u konfirmua për publikun fillimisht nga Ambasadori i OSBE-së, Robert Bosch.
“Nuk kamë marrë përsipër asnjë negociatë, pasi unë e kam të qartë nenin e Kodit Zgjedhor”, ka thënë Meta, duke shtuar se procedua e me fletët e votimit nënkupton dhe eliminimin e tyre.
Kreu i diplomacisë shqiptare ka theksuar dhe një herë rëndësinë e dialogut mes palëve duke deklaruar se të gjitha zgjidhjet e mundshme për pretendimet e opozitës ekzistojnë në Kushtetutë dhe në gjithë ligjet e vendit.
“Asnjë gjë nuk ka pse të sjellë ngërç, nëse ekziston vullneti për të gjetur zgjedhje. Egziston gjithë hapësira kushtetuese që këto pretendime të marrin zgjidhje”, tha Meta.
Meta u shpreh se për çdo pretendim të opozitës Kodi Zgjedhor dhe Kushtetuta janë dokumentet që flasin shumë qartë.
Qëndrimi i Zëvendëskryeministrit dhe Ministrit të Jashtëm, Ilir Meta u mbajt sot gjatë një konferencë për miratimin e rezolutës së Konferencës Islamike për pavarësinë e Kosovës.
Në lidhje me këtë çështje, Meta vlerësoi se ky dokument do të rrisë numrin e njohjeve të Kosovës në vendet arabe.
m.xh/NOA
