Tiranë, 24 Maj, NOA /Milena Selimi - Vetëm pak minuta pas mesnatës së datës 23 maj, është mbyllur edicioni i shtatë i “Top Fest 2010”, festivali i vetëm i muzikës moderne shqiptare, me pjesëmarrjen e këngëtarëve, grupeve nga Shqipëria, Kosova, Maqedonia dhe diaspora.
Në një atmosferë të nxehtë dhe plot ovacione, drejtuesit e spektaklit, Arbana Osmani dhe Ledion Liço kanë përcjellë për katër orë rresht emocione të një spektakli të bukur, cilësuar edhe si më i miri në këta vite.
Në rolin e presidentit të jurisë, Alban Dudushi ka shpallur fituesin e Çmimit të Madh, këngëtaren Eneida Tarifa me këngën “Me veten”, kompozuar nga Florian Mumajesi, e cila bëhet fituese e vleftës monetare prej 2 milion lekësh.
Për herë të parë, në këtë event muzikor Çmimi i Madh kombinohet në një vlerësim mes votimit nëpërmjet internetit dhe jurisë profesioniste.
Spektakli i natës finale nisi në orën 20.30 në Pallatin e Kongreseve, ku të gjithë pjesëmarrësit në këtë natë kënduan “live”, për herë të parë në historinë e këtij festivali.
Në një komunikim të drejtpërdrejtë me publikun, prezantuesit dhe personalitetet që ndanë çmimet në skenë sollën ritëm dhe dinamizëm këtij spektakli, i cili duhet theksuar se organizuar nga TopMedia mbetet një nga spektaklet më të ndjekura në eventet muzikore shqiptare.
{youtube}jE_FYRJvtM0{/youtube}
Në një publik tepër miqësor, i cili këndonte së bashku me këngëtarët në skenë u ndanë edhe shumë çmime të tjera si:
Artistja më e mirë femër, fituar nga Besa Kokëdhima, Këngëtari më i mirë mashkull, i cili shkoi për këngëtarin Valon Shehu, Interpretuesi më i mirë për këngëtaren Mariza Ikonomi, e cila në momentin e marrjes së çmimit u shpreh se “Edhe pse ky trofe është i 13-ti për mua, mbetet e rëndësishme që ndodhem këtu në këtë sallë dhe me këtë publik”. Çmimin si artisti i ri më i mirë e fitoi grupi XXL nga Kosova, ndërsa NRG-Band fitoi çmimin nga Top Albania Radio.
Një çmim si këngëtari më i mirë i muzikës pop&rock i shkoi Kamela Islamit, ndërsa grupi Troja fitoi çmimin si grupi më i mirë.
U nderua edhe Noisy me çmimin e internetit, si këngëtari më i votuar.
Në një transmetim të drejtpërdrejtë në regjinë e Ergus Lubonjës, në një skenografi të gjallë dhe dinamike, realizuar nga skenografi Fatmir Minga, në një prezantim që i thyen kornizat e një skene tradicionale, në një pjesëmarrje të gjerë të këngëtarëve jo vetëm nga Shqipëria, por edhe jashtë trojeve tona, në një publik të jashtëzakonshëm në sallë, Alban Dudushi në momentin e ndarjes së çmimit nuk harroi të kujtojë Presidentin e TopMedia-s, Dritan Hoxhën duke u shprehur se “Ëndrra vazhdon”.
m.s/n.e/NOA
